ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (ഐ.ഐ.ടി.) ബാച്ചിലർ ഓഫ് ആർക്കിടെക്ചർ പ്രവേശനത്തിനായി നടത്തുന്ന അഭിരുചിപരീക്ഷയാണ് ആർക്കിടെക്ചർ ആപ്റ്റിറ്റ്യൂഡ്‌ ടെസ്റ്റ് (എ.എ.ടി.).

ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (ഐ.ഐ.ടി.) ബാച്ചിലർ ഓഫ് ആർക്കിടെക്ചർ പ്രവേശനത്തിനായി നടത്തുന്ന അഭിരുചിപരീക്ഷയാണ് ആർക്കിടെക്ചർ ആപ്റ്റിറ്റ്യൂഡ്‌ ടെസ്റ്റ് (എ.എ.ടി.). നാഷണൽ ആപ്റ്റിറ്റ്യൂഡ്‌ ടെസ്റ്റ് ഇൻ ആർക്കിടെക്ചർ (നാറ്റ), ജോയന്റ് എൻട്രൻസ് എക്സാമിനേഷൻ (ജെ.ഇ. ഇ.) മെയിൻ ബി.ആർക് പേപ്പർ എന്നിവയ്ക്ക് നേരിട്ട് അപേക്ഷിക്കുന്നതുപോലെ എ.എ.ടി.ക്ക് നേരിട്ട് ഒരാൾക്ക് അപേക്ഷിക്കാൻ കഴിയില്ല.

ഐ.ഐ.ടി. പ്രവേശനപരീക്ഷയായ ജെ.ഇ.ഇ. അഡ്വാൻസ്ഡ് അഭിമുഖീകരിച്ച്, അതിന്റെ റാങ്ക് പട്ടികയിൽ സ്ഥാനംനേടുന്നവർക്ക് ഐ.ഐ.ടി. ബി.ആർക്. പ്രവേശനത്തിൽ താത്‌പര്യമുണ്ടെങ്കിൽ അഡ്വാൻസ്ഡ് റാങ്ക് വന്നശേഷം എ.എ.ടി.ക്ക് അപേക്ഷിക്കാം.

ബി.ആർക്. പ്രവേശനത്തിന് പരിഗണിക്കപ്പെടണമെങ്കിൽ എ.എ.ടി.യിൽ കട്ട് ഓഫ് മാർക്ക് നേടണം. എന്നാൽ, എ.എ.ടി.യുടെ അടിസ്ഥാനത്തിൽ ഒരു റാങ്ക് നൽകുന്നതല്ല. എ.എ.ടി. ജയിക്കുന്നവരുടെ ജെ.ഇ.ഇ. അഡ്വാൻസ്ഡ് റാങ്ക് പരിഗണിച്ചാകും ഐ.ഐ.ടി. ബി.ആർക്. പ്രവേശനം.

ജെ.ഇ.ഇ. അഡ്വാൻസ്ഡ് അഭിമുഖീകരിക്കാൻ അർഹത ലഭിക്കണമെങ്കിൽ ജെ.ഇ.ഇ. മെയിൻ ബി.ഇ./ബി.ടെക്. പേപ്പർ അഭിമുഖീകരിച്ച് ജെ.ഇ.ഇ. അഡ്വാൻസ്ഡ് അഭിമുഖീകരിക്കാൻ വിവിധ കാറ്റഗറികളിൽനിന്നായി അർഹത ലഭിക്കുന്ന 2,50,000 പേരിൽ ഒരാളാകണം എന്നകാര്യം ശ്രദ്ധിക്കുക.