എം. ബഷീർ
തിരുവനന്തപുരം
: സംസ്ഥാനത്തെ സർക്കാർ, എയ്ഡഡ് കോളേജുകളിൽ മൂന്നുവർഷ ബിരുദ സമ്പ്രദായം മാറ്റണമെന്ന് സർക്കാർ നിയോഗിച്ച വിദഗ്ധസമിതി.
ഗവേഷണത്തിന് മുൻതൂക്കം നൽകിയുള്ള ഓണേഴ്‌സ് ബിരുദവും ഏകീകൃത ബിരുദാനന്തരബിരുദവും തുടങ്ങണമെന്നാണ് ശുപാർശ. നിലവിലെ പരീക്ഷാ സമ്പ്രദായത്തിനും കാതലായ മാറ്റമുണ്ടാകണം. എം.ജി. സർവകലാശാല വൈസ് ചാൻസലർ ഡോ. സാബു തോമസിന്റെ അധ്യക്ഷതയിലുള്ള സമിതി ഉന്നതവിദ്യാഭ്യാസ വകുപ്പിന് നൽകിയ റിപ്പോർട്ടിലാണ് കോളേജ്‌ വിദ്യാഭ്യാസത്തിൽ കാതലായ മാറ്റം കൊണ്ടുവരുന്ന ഈ ശുപാർശകൾ.
നാലുവർഷത്തെ ഓണേഴ്‌സ് ബിരുദം
• സംസ്ഥാനത്തെ മൂന്നുവർഷ ബിരുദം പല വിദേശസർവകലാശാലകളും അംഗീകരിക്കുന്നില്ല. അത് നാലുവർഷ ഓണേഴ്‌സ് ബിരുദമാക്കണം.
• ഇക്കണോമിക്സ്‌, സ്റ്റാറ്റിസ്റ്റിക്സ്, ഫിസിക്സ്, കെമിസ്ട്രി, ഹിസ്റ്ററി, ബയോളജി ഉൾപ്പെടെയുള്ള വിഷയങ്ങളിൽ ഓണേഴ്‌സ് ബിരുദമാകാം.
• നാക് എ-യോ അതിനുമുകളിലോ സർട്ടിഫിക്കേഷനുള്ള കോളേജുകളിലും സർവകലാശാലകളിലും ഇത് തുടങ്ങാം.
• നാഷണൽ ഇൻസ്റ്റിറ്റ്യൂട്ട് റാങ്കിങ് ഫ്രെയിംവർക്ക‌ിൽ ആദ്യ നൂറിൽപ്പെടുന്ന കോളേജുകൾക്കും 50-ൽ ഉൾപ്പെടുന്ന സർവകലാശാലകൾക്കും ഓണേഴ്‌സ് അനുവദിക്കാം.
• വിവിധ ആർട്‌സ്, സയൻസ് വിഷയങ്ങളിൽ ട്രിപ്പിൾ മെയിൻ ബിരുദ കോഴ്‌സാകാം.
• നാലാംവർഷം ഐച്ഛിക വിഷയം തിരഞ്ഞെടുക്കാനാവുന്ന നാലുവർഷ ബിരുദവുമാകാം.
ഓർമ പരിശോധിക്കലല്ല പരീക്ഷ
• ഓർമ പരിശോധിക്കൽ രീതിയിൽനിന്ന് അസൈൻമെന്റുകളും പ്രസന്റേഷനും എഴുത്തുമൊക്കെ ഉൾപ്പെടുന്ന ക്രിയാത്മക പഠനരീതിയെ അടിസ്ഥാനമാക്കിയാകണം പരീക്ഷകൾ.
• ഓൺലൈൻ കോഴ്സ് പങ്കാളിത്തവും ഇതിന്റെ ഭാഗമാക്കണം. ഇവയൊക്കെ കണക്കിലെടുത്തുള്ള മൂല്യനിർണയമാണ് വേണ്ടത്‌.
പി.ജി. പ്രോഗ്രാമുകൾ വ്യാപിപ്പിക്കണം
• ഡേറ്റ അനലിറ്റിക്സ്, സ്പേസ് സയൻസ്, ഫൊറൻസിക് സയൻസ്, ഡിസാസ്റ്റർ മാനേജ്‌മെന്റ് വിഷയങ്ങളിൽ പി.ജി. പ്രോഗ്രാമുകൾ വ്യാപിപ്പിക്കണം.
• എജ്യുക്കേഷണൽ ടെക്‌നോളജി, ഫിൻടെക്, ഓട്ടോണമസ് സിസ്റ്റംസ്, ഹെൽത്ത് സയൻസ് ടെക്‌നോളജി വിഷയങ്ങളിൽ എം.ടെക് കോഴ്സ്.
• നാനോ സയൻസ് ആൻഡ് നാനോ ടെക്‌നോളജി, ജെൻഡർ സ്റ്റഡീസ് ആൻഡ് സെക്ഷ്വാലിറ്റി, കംപാരറ്റീവ് സോഷ്യൽ റിസർച്ച് തുടങ്ങിയ വിഷയങ്ങളിൽ സർവകലാശാല അക്കാദമിക് വകുപ്പുകളിൽ എം.ടെക്, എം.എസ്‌സി, എം.എ. കോഴ്‌സുകൾ തുടങ്ങാം.
No comments:
Post a Comment