ഭാവിയുടെ തൊഴിൽ മേഖല

കെ. അർജുൻ

ഇന്റർനെറ്റ് യുഗത്തിൽ തൊഴിൽസാധ്യതകൾ ഏറെയുള്ള മേഖലകളാണ് ഡേറ്റ അനലിറ്റിക്സ്, സൈബർ സെക്യൂരിറ്റി, മെഷീൻ ഇന്റലിജൻസ്, ജിയോസ്‌പേഷ്യൽ അനലറ്റിക്സ് എന്നിവ. ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്‌നോളജി ആൻഡ് മാനേജ്മന്റ് - കേരള (ഐ.ഐ.ഐ.ടി.എം.- കെ) തിരുവനന്തപുരം, ഡേറ്റ അനലിറ്റിക്സ്, സൈബർ സെക്യൂരിറ്റി, മെഷീൻ ഇന്റലിജൻസ്, ജിയോസ്‌പേഷ്യൽ അനലറ്റിക്സ് എന്നിവയിൽ സ്പെഷ്യലൈസേഷനുകളോടുകൂടിയ എം.എസ്‌സി. കംപ്യൂട്ടർ സയൻസ് പ്രോഗ്രാമിന് അപേക്ഷിക്കാം.

ഡേറ്റ അനലിറ്റിക്സ്

ഇന്റർനെറ്റിൽ ദിവസവും ഉപയോഗിക്കുന്ന വിവരങ്ങൾ നിരീക്ഷിച്ച് അതിൽനിന്നും ആവശ്യമായ വിവരങ്ങൾ മറ്റുകാര്യങ്ങൾക്ക് ഉപയോഗിക്കുന്നതാണ് ഡേറ്റ അനലിറ്റിക്സ്. ഈ ഡേറ്റകൾ ഉപയോഗിച്ച്‌ സാധനങ്ങളും സേവനങ്ങളും മാർക്കറ്റ് ചെയ്യുന്നതിനും പുതിയ വിപണനതന്ത്രങ്ങളും പ്രചാരണ രീതികളും ആവിഷ്കരിക്കുന്നു. ഡേറ്റ അനലിസ്റ്റ്, ഡേറ്റ സയന്റിസ്റ്റ്, ഡേറ്റ ആർക്കിടെക്ട്, ഡേറ്റ അഡ്മിനിസ്‌ട്രേറ്റർ തുടങ്ങിയ മേഖലകളിലാണ്‌ ഡേറ്റ അനലിറ്റിക്സ് സ്പെഷ്യലൈസ് ചെയ്ത ഒരാൾക്ക്‌ ലഭ്യമാകുന്ന തൊഴിലുകൾ.

ജിയോസ്‌പേഷ്യൽ അനലിറ്റിക്സ്

സാറ്റ്‌ലൈറ്റ് ഫോട്ടോഗ്രാഫുകൾ, ജി.പി.എസ്. ഉൾപ്പെടെയുള്ള ജിയോഗ്രാഫിക് ഇൻഫർമേഷൻ സിസ്റ്റം (ജി.ഐ.എസ്.) ഡേറ്റകൾ ശേഖരിക്കുകയും അപഗ്രഥനം ചെയ്യുകയും വ്യവസായിക ആവശ്യങ്ങൾക്കായി മാറ്റിയെടുക്കുകയും ചെയ്യുന്നതാണ് ജിയോസ്‌പേഷ്യൽ അനലിറ്റിക്‌സ്. ജി.പി.എസ്., ജോഗ്രഫിക് ഇൻഫർമേഷൻ സിസ്റ്റം (ജി.ഐ.എസ്.), റിമോട്ട് സെൻസിങ് എന്നിവ ഇതുമായി ബന്ധപ്പെട്ട ശാസ്ത്രശാഖകളാണ്. ജിയോസ്‌പേഷ്യൽ സാങ്കേതികവിദ്യകൾ ഡേറ്റാ അനലിറ്റിക്‌സിന്റെ ഉപയോഗവും പ്രസക്തിയും വർധിപ്പിക്കുന്നു. ജി. ഐ.എസ്. എക്‌സിക്യുട്ടീവ്, അനലിസ്റ്റ്, പ്രോഗ്രാമർ, ടെക്‌നീഷ്യൻ, പ്രോജക്ട് ലീഡ്, ഫോട്ടോഗ്രാമെട്രി എൻജിനിയർ, ഡെവലപ്പർ, ഡേറ്റ അനലിസ്റ്റ് മേഖലകളിൽ പ്രവർത്തിക്കാം.

മെഷീൻ ഇന്റലിജൻസ്

നിർമിതബുദ്ധിയുള്ള യന്ത്രങ്ങളുടെ സൃഷ്ടിയും നിയന്ത്രണവും യാഥാർഥ്യമാക്കുന്ന കംപ്യൂട്ടർ ശാഖയാണിത്. ആർട്ടിഫിഷ്യൽ ഇന്റലിജൻസിന്റെ ഉപവിഭാഗമായും ഇതിനെ പറയാം. എം. എൽ. ഡേറ്റ സയിന്റിസ്റ്റ്, ഡിജിറ്റൽ നോളജ് മാനേജർ, എ.ഐ. ഇന്ററാക്ഷൻ ഡിസൈനർ തുടങ്ങി ഒട്ടേറെ അവസരങ്ങളുണ്ട്. ലിങ്ക്ഡ് ഇൻ എമേർജിങ് ജോബ്‌സ് റിപ്പോർട്ട് പ്രകാരം കഴിഞ്ഞ നാലുവർഷത്തിനകം ഈ മേഖലയിൽ പ്രതിവർഷം 74 ശതമാനം വളർച്ചയുണ്ടായിട്ടുണ്ട്.

സൈബർ സെക്യൂരിറ്റി

ഹാക്കിങ്, മാൽവേർ, ഫിഷിങ്, ഇന്റർനെറ്റ് ഓഫ് തിങ്‌സുകളിലുള്ള ആക്രമണങ്ങൾ, ഡേറ്റ ബ്രീചെസ്, സ്‌പൈയിങ് എന്നിവ പ്രതിരോധിക്കുന്നതിനൊപ്പം ഡേറ്റകൾക്കും കംപ്യൂട്ടറുകൾ, സ്മാർട്ട് ഫോണുകൾ ഉൾപ്പടെയുള്ള ഉപകരണങ്ങൾക്കും സൈബർ ആക്രമണങ്ങളിൽനിന്ന് പഴുതടച്ച സുരക്ഷ ഉറപ്പാക്കുകയാണ് സൈബർ സെക്യൂരിറ്റിയിലൂടെ ചെയ്യുന്നത്. വിവിധ മൾട്ടിനാഷണൽ കമ്പനികൾ കഴിഞ്ഞ കാലങ്ങളിൽ ഇരട്ടി ആളുകളെയാണ് നിയമിച്ചത്. സൈബർ സെക്യൂരിറ്റി സ്‌പെഷ്യലിസ്റ്റ്, സെക്യൂരിറ്റി അനലിസ്റ്റ്, സൈബർ സെക്യൂരിറ്റി ആർക്കിടെക്ട്, സൈബർ സെക്യൂരിറ്റി റിസർച്ചേർ, ഐ.ടി. സെക്യൂരിറ്റി അനലിസ്റ്റ് തുടങ്ങിയ മേഖലകളിൽ അവസരങ്ങൾ

ഇന്റേൺഷിപ്പ്

കോഴ്‌സിന്റെ നാലാം സെമസ്റ്ററിലാണ് ഇന്റേൺഷിപ്പ്. ജോലിയുടെ സ്വഭാവം മനസ്സിലാക്കി ശോഭിക്കാൻ ഇന്റേൺഷിപ്പ് സഹായിക്കും. ഇന്റേൺഷിപ്പ് പൂർത്തിയാക്കുന്ന കമ്പനികളിൽതന്നെ കുട്ടികൾക്ക് ജോലിയും ഭിച്ചേക്കും.

യോഗ്യത

കുറഞ്ഞത് 60 ശതമാനം മാർക്കോടെ മാത്തമാറ്റിക്സ് ഒരു വിഷയമായ സയൻസ്, എൻജിനിയറിങ്, ടെക്‌നോളജി ബിരുദമാണ് യോഗ്യത. അവസാനവർഷ വിദ്യാർഥികൾക്കും അപേക്ഷിക്കാം. പ്രവേശനപരീക്ഷയുണ്ട്

ഓർമിക്കാൻ

അവസാന തീയതി: ജൂൺ 14. വിവരങ്ങൾക്ക്: www.iiitmk.ac.in/admission

അവസരങ്ങൾ നേടിയെടുക്കാം

ഡിജിറ്റൽ സാങ്കേതിക മേഖലകളിലെ വിദഗ്ധരെ വാർത്തെടുക്കുകയെന്ന ലക്ഷ്യത്തോടെയാണ് ഐ.ഐ.ഐ.ടി.എം.-കെ. കോഴ്‌സുകൾ നടത്തുന്നത്. അവസരങ്ങൾ നേടിയെടുക്കണമെങ്കിൽ ഡിജിറ്റൽ സാങ്കേതികവിദ്യയുടെ അധിപനാകണം. ഇവിടെയാണ് ഈ കോഴ്‌സുകൾ പ്രസക്തമാകുന്നത്.

ഡോ. സജി ഗോപിനാഥ്

ഡയറക്ടർ, ഐ.ഐ.ഐ.ടി.എം.-കെ