സി.ബി.എസ്.ഇ. കംപ്യൂട്ടർ സയൻസ് സ്ട്രീമിൽ 2019-ൽ പ്ലസ്ടു ജയിച്ചു. മൊത്തം 75 ശതമാനം മാർക്ക് ഇല്ലാഞ്ഞതിനാൽ മൂന്ന് വിഷയത്തിൽ ഇംപ്രൂവ്മെന്റ് പരീക്ഷയെഴുതി ഫലം കാത്തിരിക്കുന്നു. ഈ മാർക്ക് കിട്ടുകയും ജെ.ഇ.ഇ. യോഗ്യത നേടുകയും ചെയ്താൽ, ഈവർഷം എൻ.ഐ.ടി. പ്രവേശനത്തിനു പരിഗണിക്കുമോ ? ജെ.ഇ.ഇ. യോഗ്യത കിട്ടുന്നില്ലെങ്കിൽ 2021-ലെ ജെ.ഇ.ഇ. എഴുതാൻ പറ്റുമോ ? -ഗൗതം, ആലപ്പുഴ
ജെ.ഇ.ഇ. മെയിനിന് റാങ്ക് പട്ടികയിൽ സ്ഥാനംനേടാൻ പ്രത്യേകിച്ചൊരു യോഗ്യതാമാർക്ക് വ്യവസ്ഥയില്ല. പരീക്ഷ അഭിമുഖീകരിക്കുന്നവർക്ക് ലഭിക്കുന്ന മാർക്കിന്റെ അടിസ്ഥാനത്തിൽ ഒരു റാങ്ക് അനുവദിക്കും. റാങ്ക് ലഭിക്കുന്നവർക്കെല്ലാം എൻ.ഐ.ടി. വിഭാഗ ചോയ്‌സ് ഫില്ലിങ്ങിൽ പങ്കെടുക്കാം. അലോട്ട്‌മെന്റ് ലഭിച്ചാൽ, രേഖാപരിശോധന വേളയിലാണ് വിദ്യാഭ്യാസയോഗ്യത പരിശോധിക്കുന്നത്. ആ സമയത്ത് പ്ലസ്ടുവിന് 75 ശതമാനം മാർക്ക് ലഭിച്ചത് തെളിയിച്ചാൽ നിങ്ങൾക്ക് പ്രവേശനം നേടാം.
2020-ലെ ജെ.ഇ.ഇ. മെയിൻ പ്രോസ്പെക്ടസ് പ്രകാരം 2020-ലെ പരീക്ഷ അഭിമുഖീകരിക്കാൻ 2018, 2019, 2020 വർഷങ്ങളിൽ പ്ലസ്ടു ജയിച്ചവർക്കാണ് അർഹത. ഈ വ്യവസ്ഥ 2021 പ്രവേശനത്തിനും തുടരുന്നപക്ഷം 2019, 2020 വർഷങ്ങളിൽ പ്ലസ് ടു ജയിച്ചവർ, 2021-ൽ അത് അഭിമുഖീകരിക്കുന്നവർ എന്നിവർക്കായിരിക്കും 2021 ജെ.ഇ.ഇ. മെയിൻ അഭിമുഖീകരിക്കാൻ അർഹത കിട്ടുക. 2020-ൽ പ്രവേശനം കിട്ടുന്നില്ലെങ്കിൽ 2019-ൽ പ്ലസ്ടു ജയിച്ച കുട്ടി എന്ന നിലയിൽ 2021-ലെ ജെ.ഇ.ഇ. മെയിനിന് അപേക്ഷിക്കുന്നതിന് നിലവിലെ വ്യവസ്ഥയനുസരിച്ച് തടസ്സമില്ല. പക്ഷേ, ജെ.ഇ.ഇ. അഡ്വാൻസ്ഡ് അടുത്തവർഷം നിങ്ങൾക്ക് അർഹത ഉണ്ടാകില്ല.
2020-ലെ ജെ.ഇ.ഇ. അഡ്വാൻസ്ഡിന് 2019-ലോ 2020-ലോ പ്ലസ് ടു ജയിക്കണമെന്നാണ് വ്യവസ്ഥ. അതനുസരിച്ച് ജെ.ഇ.ഇ. അഡ്വാൻസ്ഡ് 2020-ൽകൂടി നിങ്ങൾക്ക് അവസരമുണ്ട്. ജെ.ഇ.ഇ. മെയിൻ ബി.ഇ./ബി.ടെക്. പേപ്പറിലെ നിങ്ങളുടെ സ്‌കോർ അടിസ്ഥാനമാക്കി 2020-ലെ ജെ.ഇ.ഇ. അഡ്വാൻസ്ഡ് നിങ്ങൾ യോഗ്യത നേടിയാൽ ഈ വർഷത്തെ ജെ.ഇ.ഇ. അഡ്വാൻസ്ഡ് നിങ്ങൾക്ക് അഭിമുഖീകരിക്കാം.
ഈ വ്യവസ്ഥ തുടർന്നാൽ 2021 പ്രവേശനത്തിന് 2020, 2021 വർഷങ്ങളിൽ പ്ലസ്ടു ജയിച്ചവർക്കായിരിക്കും പ്രവേശനത്തിനുള്ള അർഹത ലഭിക്കുക. അങ്ങനെയെങ്കിൽ 2021-ലെ ജെ.ഇ.ഇ അഡ്വാൻസ്ഡിന് നിങ്ങൾക്ക് അർഹതയുണ്ടാകില്ല.
https://english.mathrubhumi.com/education/help-desk /ask-expert
No comments:
Post a Comment