Education

19/02/2020 

പാദരക്ഷ ഡിസൈനിങ്, മാർക്കറ്റിങ് പഠിക്കാം

പരീക്ഷാ അപേക്ഷ

മാർച്ച് 23-ന് തുടങ്ങുന്ന ഒന്നാം വർഷ ബി.എസ്‌സി. ഒപ്‌റ്റോമെട്രി ഡിഗ്രി സപ്ലിമെന്ററി (2014/2016 സ്‌കീം) പരീക്ഷയ്ക്ക് ഫെബ്രുവരി 29 വരെ ഓൺലൈൻ ആയി രജിസ്റ്റർ ചെയ്യാം. ഏപ്രിൽ മൂന്നിനാരംഭിക്കുന്ന നാലാം വർഷ ബി.എസ്‌സി. നഴ്‌സിങ്‌ ഡിഗ്രി സപ്ലിമെന്ററി (അർഹരായ മേഴ്‌സി ചാൻസ് വിദ്യാർഥികൾക്കുൾപ്പെടെ) പരീക്ഷയ്ക്ക് മാർച്ച് രണ്ടു മുതൽ 12 വരെ ഓൺലൈൻ ആയി രജിസ്റ്റർ ചെയ്യാം.

പരീക്ഷത്തീയതി

2020 മാർച്ച് രണ്ടിന് തുടങ്ങുന്ന ഒന്നാം സെമസ്റ്റർ എം.ഫാം ഡിഗ്രി റെഗുലർ/സപ്ലിമെന്ററി (2019 & 2017 സ്‌കീം) തിയറി പരീക്ഷ, മാർച്ച് മൂന്നിന് തുടങ്ങുന്ന ഫസ്റ്റ് പ്രൊഫഷണൽ ബി.എസ്.എം.എസ്. ഡിഗ്രി സപ്ലിമെന്ററി തിയറി പരീക്ഷകളുടെ ടൈംടേബിൾ പ്രസിദ്ധീകരിച്ചു.

പരീക്ഷാഫലം

ഡിസംബറിൽ നടന്ന രണ്ടാം വർഷ ഫാം.ഡി. ഡിഗ്രി സപ്ലിമെന്ററി പരീക്ഷാഫലം പ്രസിദ്ധീകരിച്ചു.

എം.ജി. പി.ജി.: 20 മുതൽ അപേക്ഷിക്കാം

:എം.ജി. സർവകലാശാല കോട്ടയം, പഠനവകുപ്പുകളിലെയും ഇന്റർ സ്‌കൂൾ സെന്ററിലെയും വിവിധ ബിരുദാനന്തര ബിരുദ കോഴ്‌സുകളിലേക്കുള്ള പൊതുപ്രവേശന പരീക്ഷയ്ക്ക് (കാറ്റ്) അപേക്ഷിക്കാം. 20 മുതൽ മാർച്ച് 20 വരെ www.cat.mgu.ac.in വഴി അപേക്ഷിക്കാം.എഴുത്തുപരീക്ഷ, ഗ്രൂപ്പ് ഡിസ്‌കഷൻ, ഇന്റർവ്യൂ എന്നിവയുടെ അടിസ്ഥാനത്തിലാണ് പ്രവേശനം. സ്‌കൂൾ ഓഫ് മാനേജ്‌മെന്റ് ആൻഡ് ബിസിനസ് സ്റ്റഡീസിലെ എം.ബി.എ. പ്രോഗ്രാമിലേക്ക് www.admission.mgu.ac.in വഴി അപേക്ഷിക്കണം.

വിവരങ്ങൾക്ക്: 9446224 240. ഒരു വിദ്യാർഥിക്ക് ഒരു അപേക്ഷ മാത്രമേ നൽകാനാവൂ. എം.ബി.എ. ഒഴികെ മറ്റ് പ്രോഗ്രാമുകൾക്ക് ഒരു അപേക്ഷയിലൂടെ നാല് വിവിധ പ്രോഗ്രാമുകൾക്കുവരെ അപേക്ഷിക്കാം. ഒന്നിലധികം അപേക്ഷകൾ (എം.ബി.എ. ഒഴികെ) നൽകുന്നവരുടെ അപേക്ഷ റദ്ദാകും.

എൽഎൽ.എം. ഉത്തരസൂചിക

:എൽഎൽ.എം. പ്രവേശന പരീക്ഷയുടെ ഉത്തരസൂചിക www.cee.kerala.gov.in ൽ പ്രസിദ്ധീകരിച്ചു. ആക്ഷേപമുള്ളവർ പരാതിയോടൊപ്പം അനുബന്ധ രേഖകളും ഓരോ ചോദ്യത്തിനും ഫീസ് അടച്ച് 24-ന് വൈകീട്ട് നാലിന് മുമ്പ്‌ പ്രവേശന പരീക്ഷാ കമ്മിഷണർക്ക് ലഭിക്കണം.

ഡോ. എസ്. രാജൂകൃഷ്ണൻ

:കേന്ദ്ര വാണിജ്യ വ്യവസായ മന്ത്രാലയത്തിനു കീഴിലുള്ള, ഫുട്‌വേർ ഡെവലപ്മെന്റ് ആൻഡ് ഡിസൈൻ ഇൻസ്റ്റിറ്റ്യൂട്ട് (എഫ്.ഡി.ഡി.ഐ.), 12 കേന്ദ്രങ്ങളിൽ നടത്തുന്ന വിവിധ ബിരുദ, ബിരുദാനന്തര പ്രോഗ്രാമുകളിലെ പ്രവേശനത്തിന് അപേക്ഷ ക്ഷണിച്ചു.

നോയിഡ, ഫർസാത്ഗൻജ് (യു.പി.), ചെന്നൈ, കൊൽക്കത്ത, റോഹ്‌തക്, ജോധ്‌പുർ, ഛിൻഡ് വാര (എം.പി.), ഗുണ (എം.പി.), അംഗ്ലേശ്വർ (ഗുജറാത്ത്), ഹൈദരാബാദ്, പട്ന, ചണ്ഡീഗഢ്‌, എന്നിവിടങ്ങളിലാണ് എഫ്.ഡി.ഡി.ഐ. കേന്ദ്രങ്ങൾ. അപേക്ഷകർക്ക് ഇംഗ്ലീഷിൽ മികച്ച ആശയ വിനിമയശേഷി വേണം.

•ബിരുദതലത്തിൽ നാലുവർഷം ദൈർഘ്യമുള്ള ബാച്ചിലർ ഓഫ് ഡിസൈൻ (ബി.ഡിസ്.) പ്രോഗ്രാം, ഫുട് വേർ ഡിസൈൻ ആൻഡ് പ്രൊഡക്‌ഷൻ, ലതർ ഗുഡ്സ് ആൻഡ് ആക്സസറി ഡിസൈൻ, ഫാഷൻ ഡിസൈൻ എന്നീ സവിശേഷ മേഖലകളിൽ ഉണ്ട്. കൂടാതെ, മൂന്ന് വർഷം ദൈർഘ്യമുള്ള ബാച്ചിലർ ഓഫ് ബിസിനസ് അഡ്മിനിസ്ട്രേഷൻ (ബി.ബി.എ.) (റീട്ടെയിൽ ആൻഡ് ഫാഷൻ മർക്കൻഡൈസ്) പ്രോഗ്രാമും ലഭ്യമാണ്‌. പ്ലസ് ടു/തത്തുല്യ പരീക്ഷ ജയിച്ചവർക്ക് അപേക്ഷിക്കാം. പത്താം ക്ലാസിനുശേഷം എ.ഐ.സി.ടി.ഇ. അംഗീകൃത ത്രിവത്സര ഫുൾ ടൈം ഡിപ്ലോമ നേടിയവരും അപേക്ഷിക്കാൻ അർഹരാണ്‌.

•ഫുട്‌വേർ ഡിസൈൻ ആൻഡ് പ്രൊഡക്‌ഷനിലെ മാസ്റ്റർ ഓഫ് ഡിസൈൻ (എം.ഡിസ്.) പ്രോഗ്രാം പ്രവേശനത്തിന് അപേക്ഷാർഥിക്ക് ഫുട്‌വേർ, ലതർ ഗുഡ്സ്, ഡിസൈൻ, ഫാഷൻ, ഫൈൻ ആർട്സ്, ആർക്കിടെക്ചർ, എൻജിനിയറിങ്, പ്രൊഡക്‌ഷൻ, ടെക്നോളജി എന്നിവയിലൊന്നിലെ ബിരുദം വേണം.

•റീട്ടെയിൽ ആൻഡ് ഫാഷൻ മർക്കൻഡൈസിലെ മാസ്റ്റർ ഓഫ് ബിസിനസ് അഡ്മിനിസ്ട്രേഷൻ (എം.ബി.എ.) പ്രവേശനത്തിന് ബിരുദമാണ് യോഗ്യത. രണ്ടുവർഷം ദൈർഘ്യമുള്ള, പി.ജി. പ്രോഗ്രാമുകളിലെ പ്രവേശനത്തിന് ഉയർന്ന പ്രായപരിധിയില്ല.

പ്രവേശനപരീക്ഷ

പ്രവേശനം മേയ് 24-ന് ദേശീയ തലത്തിൽ നടത്തുന്ന പേപ്പർ അധിഷ്ഠിത ഓൾ ഇന്ത്യ സെലക്‌ഷൻ ടെസ്റ്റ് (എ.ഐ.എസ്.ടി.) അടിസ്ഥാനമാക്കിയാകും. കൊച്ചി പരീക്ഷാകേന്ദ്രമാണ്.

•ബിരുദ പ്രവേശനപരീക്ഷയ്ക്ക് നാല് ഭാഗങ്ങളിലായി ചോദ്യങ്ങളുണ്ടാകും. ഭാഗം എ- ക്വാണ്ടിറ്റേറ്റീവ് ആപ്റ്റിറ്റ്യൂഡ് (രണ്ട് മാർക്കുവീതമുള്ള 25 ചോദ്യങ്ങൾ), ഭാഗം ബി- വെർബൽ എബിലിറ്റി. ഇതിൽ, കോംപ്രിഹൻഷൻ, ഗ്രാമർ, യൂസേജ് മുതലായവ (രണ്ട് മാർക്കിന്റെ 10-ഉം, ഒരു മാർക്കിന്റെ 30-ഉം ചോദ്യം) ഭാഗം സി - ജനറൽ അവയർനസ് (ഒരു മാർക്ക്, 50 ചോദ്യങ്ങൾ), ഭാഗം ഡി - ബിസിനസ് ആപ്റ്റിറ്റ്യൂഡ് ടെസ്റ്റ് (രണ്ടുമാർക്കിന്റെ 15-ഉം, ഒരു മാർക്കിന്റെ 20-ഉം ചോദ്യങ്ങൾ)

•മാസ്റ്റേഴ്സ് പ്രവേശനപരീക്ഷയ്ക്ക്, ക്വാണ്ടിറ്റേറ്റീവ് ആപ്റ്റിറ്റ്യൂഡ് (രണ്ട് മാർക്ക്, 25 ചോദ്യങ്ങൾ), ഇംഗ്ലീഷ് കോംപ്രിഹൻഷൻ ആൻഡ് അനലിറ്റിക്കൽ എബിലിറ്റി (1-50), ജനറൽ നോളജ് ആൻഡ് കറന്റ് അഫയേഴ്സ് (1-50), മാനേജ്മെന്റ് ആപ്റ്റിറ്റ്യൂഡ് ടെസ്റ്റ് (1-50).

അപേക്ഷ

https://applyadmission.net/fddi2020 വഴി ഏപ്രിൽ 15-നകം നൽകണം. യോഗ്യതാപരീക്ഷ അഭിമുഖീകരിക്കുന്നവർക്കും അപേക്ഷിക്കാം. അപേക്ഷാ പ്രിന്റ് ഔട്ട് എടുത്ത് സൂക്ഷിക്കണം.

ബി.എസ്‌സി. സുവോളജി ഫൈനൽ ഇയർ വിദ്യാർഥിയാണ്. ‘കീം’ വഴിയുള്ള മെഡിക്കൽ പ്രവേശനത്തിന് അപേക്ഷിക്കാൻ കഴിയുമോ ?

- ആനന്ദ്, കോട്ടയം

പ്ലസ്ടു തലത്തിലെ യോഗ്യതവെച്ച് പ്രവേശനത്തിന് അർഹതയുള്ളവർക്ക് അതിന്റെ അടിസ്ഥാനത്തിൽ അപേക്ഷിക്കാം. ആ വ്യവസ്ഥ തൃപ്തിപ്പെടുത്താത്തവർക്ക് ബിരുദതല പഠനത്തിന്റെ അടിസ്ഥാനത്തിൽ അപേക്ഷിക്കാൻ കഴിയും. പ്ലസ്ടു തലത്തിൽ പഠിച്ച വിഷയങ്ങൾ, ബിരുദതല പഠനത്തിലെ വിഷയങ്ങൾ, മാർക്ക് എന്നിവ ഇതിന്റെ മാനദണ്ഡങ്ങളാണ്.

ഫിസിക്സ്, കെമിസ്ട്രി, ബയോളജി വിഷയങ്ങൾ പ്ലസ്ടു തലത്തിൽ പഠിച്ചിരിക്കണം. തുടർന്ന്, ഫിസിക്സ്, കെമിസ്ട്രി, സുവോളജി, ബോട്ടണി, ബയോടെക്നോളജി എന്നിവയിലൊന്ന് മുഖ്യ/കോർ വിഷയമായും ഇവയിൽ ഏതെങ്കിലും ഒന്നോ രണ്ടോ എണ്ണം സബ്സിഡിയറി/കോംപ്ലിമെന്ററി വിഷയങ്ങളായും ത്രിവത്സര ബി.എസ്‌സി. കോഴ്സിൽ പഠിച്ചിരിക്കണം.

മെയിൻ വിഷയത്തിനും സബ്സിഡിയറി വിഷയങ്ങൾക്കുംകൂടി മൊത്തത്തിൽ 50 ശതമാനം മാർക്ക് നേടുകയും വേണം. ഇവർക്ക്, കേരളത്തിൽ എം.ബി.ബി.എസ്., ബി.ഡി.എസ്., ബി.എ.എം.എസ്., ബി.എച്ച്.എം.എസ്., ബി.എസ്.എം.എസ്. കോഴ്സുകളിലെ പ്രവേശനത്തിന് അർഹതയുണ്ട്.

കീം 2020 പ്രോസ്പെക്ടസ് ക്ലോസ് 6.2.1 (c) (പേജ് 25)-ൽ ഇത് വിശദീകരിച്ചിട്ടുണ്ട്. വിദ്യാർഥി 2020-ലെ നീറ്റ് യു.ജി. അഭിമുഖീകരിച്ചു യോഗ്യത നേടിയിരിക്കണമെന്ന വ്യവസ്ഥയ്ക്കു വിധേയമാണിത്. എന്നാൽ, ഈ വിഭാഗത്തിൽ അപേക്ഷിക്കണമെങ്കിൽ, അപേക്ഷിക്കുന്ന വേളയിൽ വിദ്യാഭ്യാസ യോഗ്യത നേടിയിരിക്കണം. ബിരുദപരീക്ഷ എഴുതി ഫലം കാത്തിരിക്കുന്നവർക്കോ പരീക്ഷ അഭിമുഖീകരിക്കാൻ പോകുന്നവർക്കോ ഈ വ്യവസ്ഥപ്രകാരം അപേക്ഷിക്കാൻ കഴിയില്ലെന്ന് പ്രോസ്പെക്ടസ് ക്ലോസ് 6.2.7 (പേജ് 27) വ്യക്തമാക്കുന്നു.

അതായത്, കീം പ്രവേശനത്തിന് അപേക്ഷിക്കേണ്ട അവസാന തീയതിയിൽ (ഫെബ്രുവരി 25) അപേക്ഷാർഥി യോഗ്യത തൃപ്തിപ്പെടുത്തണം. ബി.എസ്‌സി. സുവോളജി പ്രോഗ്രാമിന്റെ അന്തിമവർഷ വിദ്യാർഥി എന്ന നിലയിൽ നിങ്ങൾക്ക് ഫെബ്രുവരി 25-നകം യോഗ്യത നേടാൻ കഴിയില്ല. അതിനാൽ ഈ വ്യവസ്ഥപ്രകാരം കീം 2020 മെഡിക്കൽ പ്രവേശനത്തിന് ഈ വർഷം അപേക്ഷിക്കാൻ കഴിയില്ല. 2021-ൽ ഈ വ്യവസ്ഥ തുടർന്നാൽ മറ്റ് യോഗ്യതാ വ്യവസ്ഥകൾക്ക് വിധേയമായി അപേക്ഷിക്കാൻ കഴിയും.