Career 27/02/2020

നാഷണൽ സ്കൂൾ ഓഫ് ഡ്രാമയിൽ ഡിപ്ലോമ

: കേന്ദ്ര സാംസ്കാരിക മന്ത്രാലയത്തിന് കീഴിലുള്ള നാഷണൽസ്കൂൾ ഓഫ് ഡ്രാമ (എൻ.എസ്.ഡി.) ഡ്രമാറ്റിക് ആർട്സ്, ത്രിവത്സര ഡിപ്ലോമ പ്രോഗ്രാം പ്രവേശനത്തിന് അപേക്ഷിക്കാം. ഏതെങ്കിലും വിഷയത്തിൽ ബിരുദമാണ് യോഗ്യത. ആറു തിയേറ്റർ സൃഷ്ടികളിലെങ്കിലും പങ്കെടുത്തിരിക്കണം. തെളിവായി സർട്ടിഫിക്കറ്റ്, ബ്രോഷർ, ലീഫ് ലറ്റ്, ന്യൂസ് പേപ്പർ കട്ടിങ് തുടങ്ങിയവ അപേക്ഷയ്‌ക്കൊപ്പം നൽകണം. തിയേറ്റർ മേഖലയിലെ വൈദഗ്ധ്യം തെളിയിച്ചിട്ടുള്ള ഒരാളുടെ ഒരു റെക്കമൻഡേഷൻ കത്തും വേണം.

പ്രായം 2020 ജൂലായ് ഒന്നിന് 18- നും 30- നും ഇടയിലാകണം. അപേക്ഷ www.nsd.gov.in വഴി ഫെബ്രുവരി 28 വരെ നൽകാം. രണ്ടുഘട്ടമായി നടത്തുന്ന തിരഞ്ഞെടുപ്പിന്റെ ആദ്യഘട്ടം പ്രാഥമിക സ്ക്രീനിങ്, ഓഡിഷൻ, പ്രാക്ടിക്കൽ ടെസ്റ്റ് എന്നിവ ഉൾപ്പെടുന്നതാണ്.  യോഗ്യത നേടിയാൽ ന്യൂഡൽഹിയിൽ നടത്തുന്ന നാലോ അഞ്ചോ ദിവസം ദൈർഘ്യമുള്ള വർക്ക്ഷോപ്പ് രൂപത്തിലുള്ള അന്തിമ സെലക്‌ഷൻ ടെസ്റ്റിൽ പങ്കെടുക്കാം.

കെമാറ്റ് കേരള

:എം.ബി.എ. പ്രവേശനത്തിനുള്ള കെമാറ്റ് (കേരള മാനേജ്‌മെന്റ് ആപ്റ്റിറ്റ്യൂഡ് ടെസ്റ്റ്) ഓൺലൈൻ പരീക്ഷ മേയ് അവസാനവാരത്തോടെ നടത്തുമെന്ന് പ്രവേശനപരീക്ഷാ കമ്മിഷണർ അറിയിച്ചു.

എൽഎൽ.എം. അലോട്ട്മെന്റ്

: എൽഎൽ.എം. കോഴ്‌സ് പ്രവേശനത്തിനുള്ള റാങ്ക്, കാറ്റഗറി ലിസ്റ്റുകൾ www.cee.kerala.gov.in ൽ പ്രസിദ്ധീകരിച്ചു. തിരുവനന്തപുരം സ്വദേശി എൻ.ബി. ഷെറിൻ ഒന്നാംറാങ്ക് നേടി. അലോട്ട്‌മെന്റ് നടപടികൾ ഇന്ന് ആരംഭിക്കും. മാർച്ച് നാലിന് വൈകീട്ട് നാലുവരെ ഓപ്ഷനുകൾ രജിസ്റ്റർ ചെയ്യാം. അലോട്ട്‌മെന്റ് ലഭിക്കുന്ന വിദ്യാർഥികൾ മാർച്ച് ആറുമുതൽ 10 വരെ കോളേജുകളിൽ പ്രവേശനം നേടണം.

പിന്നാക്കവിഭാഗങ്ങൾക്ക് ഒ.എൻ.ജി.സി. സ്കോളർഷിപ്പ്

: ഒ.എൻ.ജി.സി. (ഓയിൽ ആൻഡ് നാച്വറൽ ഗ്യാസ് കോർപ്പറേഷൻ) ഫൗണ്ടേഷൻ ന്യൂഡൽഹി, മറ്റു പിന്നാക്ക വിഭാഗക്കാർക്കും (ഒ.ബി.സി.), പൊതുവിഭാഗത്തിൽ സാമ്പത്തികമായി പിന്നാക്കം നിൽക്കുന്ന വിഭാഗക്കാർക്കും (ഇ.ഡബ്ല്യു.എസ്.) രണ്ട് സ്കോളർഷിപ്പുകൾ പ്രഖ്യാപിച്ചു.

പ്രൊഫഷണൽ കോഴ്സുകൾ

നിശ്ചിത പ്രൊഫഷണൽ, മാസ്റ്റേഴ്സ് കോഴ്സുകളിലെ ആദ്യ വർഷത്തിൽ പഠിക്കുന്നവർക്ക് മാസം 4000 രൂപ നിരക്കിൽ 500 വീതം സ്കോളർഷിപ്പുകളാണ് ഓരോ പദ്ധതിയിലും നൽകുന്നത്. പ്ലസ് ടുവിനുശേഷമുള്ള എൻജിനിയറിങ് പഠനത്തിന് 300-ഉം എം.ബി.ബി.എസ്. പഠനത്തിന് 50-ഉം സ്കോളർഷിപ്പുകൾ നാല് വർഷത്തേക്ക് നൽകും. ബിരുദധാരികൾക്ക് മാസ്റ്റർ ഓഫ് ബിസിനസ് അഡ്മിനിസ്ട്രേഷൻ (എം.ബി.എ.) പഠനത്തിന് 50-ഉം ജിയോളജി/ജിയോഫിസിക്സ് മാസ്റ്റേഴ്സ് പഠനത്തിന് 100-ഉം സ്കോളർഷിപ്പുകൾ രണ്ടുവർഷം ലഭിക്കും. പഠനം ഫുൾ ടൈം റഗുലർ രീതിയിലാകണം. ഓരോ പദ്ധതിയിലുമുള്ള 500 സ്കോളർഷിപ്പുകളിൽ 50 ശതമാനം വനിതകൾക്ക്.

യോഗ്യത

അപേക്ഷകർക്ക് ബാധകമായ യോഗ്യതാ പരീക്ഷയിൽ 60 ശതമാനം മാർക്ക്/10 പോയന്റ് സ്കെയിലിൽ 6.0 ഒ.ജി.പി.എ./സി.ജി.പി.എ. ഉണ്ടാകണം. ഉയർന്ന പ്രായപരിധി 1.1.2020-ന് 30 വയസ്സ്. വാർഷിക വരുമാനം രണ്ടുലക്ഷം രൂപയിൽ കവിയരുത്. തമിഴ്നാട്, കർണാടക, ആന്ധ്രാപ്രദേശ്, തെലങ്കാന, പുതുച്ചേരി, ലക്ഷദ്വീപ്, ആൻഡമാൻ ആൻഡ് നിക്കോബാർ ദ്വീപുകൾ എന്നിവയുൾപ്പെടുന്ന മേഖലയിലാണ് കേരളം. യോഗ്യതാ പരീക്ഷയ്ക്കു പഠിച്ച സ്ഥാപനം സ്ഥിതി ചെയ്യുന്ന പ്രദേശം എവിടെയാണോ ആ പ്രദേശം ഉൾപ്പെടുന്ന മേഖലയിലാണ് അപേക്ഷ നൽകേണ്ടത്.

അപേക്ഷ

www.ongcscholar.org/ വഴി അപേക്ഷ നൽകാം. അപേക്ഷയുടെ പ്രിന്റ് ഔട്ടും അനുബന്ധ രേഖകളും മാർച്ച് അഞ്ചിനകം ലഭിക്കണം. യോഗ്യതാ പരീക്ഷയിലെ മൊത്തം മാർക്ക് പരിഗണിച്ചാണ് തിരഞ്ഞെടുപ്പ്. തുല്യ മാർക്ക് വന്നാൽ കുറഞ്ഞ കുടുംബവരുമാനമുള്ളവർക്ക് മുൻഗണന്ന കിട്ടും.

ബി.പി.എൽ. വിഭാഗക്കാർക്കും പരിഗണനയുണ്ട്. ആദ്യ വർഷത്തേക്ക് സ്കോളർഷിപ്പിന് അർഹത നേടുന്നവർക്ക്, വ്യവസ്ഥകൾക്കു വിധേയമായി മാത്രമേ പുതുക്കി നൽകൂ.

Courtesy Mathrbhoomi