സിവിൽ സർവീസസ് പരീക്ഷയ്ക്ക് അപേക്ഷ ക്ഷണിച്ചു

ഫോട്ടോ: പി.കൃഷ്ണപ്രദീപ്‌

19/02/2020 Mathrbhoomi

ഐ.എ.എസ്., ഐ.പി.എസ്., ഐ.എഫ്.എസ്. തുടങ്ങിയ 24 സിവിൽ സർവീസ് കേഡറുകളിലെ നിയമനത്തിനായി യൂണിയൻ പബ്ലിക് സർവീസ് കമ്മിഷൻ (യു.പി.എസ്.സി.) നടത്തുന്ന സിവിൽ സർവീസസ് പരീക്ഷയ്ക്ക് അപേക്ഷ ക്ഷണിച്ചു. 796 ഒഴിവുണ്ട്. ഇന്ത്യൻ ഫോറസ്റ്റ് സർവീസിൽ ചേരാനും സിവിൽ സർവീസ് പ്രിലിമിനറി പരീക്ഷയെഴുതി ജയിക്കണം. മേയ് 31-നായിരിക്കും പ്രിലിമിനറി എഴുത്തുപരീക്ഷ

യോഗ്യത

ഏതെങ്കിലും വിഷയത്തിൽ ബിരുദം. അവസാനവർഷ പരീക്ഷയെഴുതി ഫലം കാത്തിരിക്കുന്നവർക്കും അവസാനവർഷ പരീക്ഷ എഴുതാനിരിക്കുന്നവർക്കും നിബന്ധനകൾക്ക് വിധേയമായി അപേക്ഷിക്കാം.

പ്രായം

2020 ഓഗസ്റ്റ് ഒന്നിന് 21-32 വയസ്സ്. 1988 ഓഗസ്റ്റ് രണ്ടിനും 1999 ഓഗസ്റ്റ് ഒന്നിനും ഇടയിൽ ജനിച്ചവരാവണം. എസ്.സി., എസ്.ടി. വിഭാഗക്കാർക്ക് അഞ്ച് വർഷവും ഒ.ബി.സി.ക്കാർക്ക് മൂന്ന് വർഷവും വിമുക്തഭടർക്ക് അഞ്ച് വർഷവും അംഗപരിമിതർക്ക് (അന്ധർ, ബധിരർ, അസ്ഥിഭംഗം വന്നവർ) 10 വർഷവും ഉയർന്ന പ്രായത്തിൽ ഇളവ് അനുവദിക്കും.

പരീക്ഷ

പ്രിലിമിനറി, മെയിൻ എന്നിങ്ങനെ രണ്ട് ഘട്ടങ്ങളാണുള്ളത്. ആദ്യഘട്ടമായ പ്രിലിമിനറി പരീക്ഷയ്ക്കാണ് ഇപ്പോൾ അപേക്ഷിക്കുന്നത്. പ്രിലിമിനറി പരീക്ഷയുടെ ഫലം വന്നതിനുശേഷം മെയിൻ പരീക്ഷയ്ക്ക് അർഹരായവർ വീണ്ടും അപേക്ഷ സമർപ്പിക്കണം. 2020-ൽത്തന്നെ മെയിൻ പരീക്ഷ നടക്കും. മെയിൻ പരീക്ഷയിൽ പങ്കെടുക്കാൻ യോഗ്യരായവരെ തിരഞ്ഞെടുക്കുകയാണ് പ്രിലിമിനറി പരീക്ഷയുടെ ലക്ഷ്യം. ഒഴിവിന്റെ 12/13 മടങ്ങ് പേരെ മെയിൻ പരീക്ഷയ്ക്കായി തിരഞ്ഞെടുക്കും. പ്രിലിമിനറി പരീക്ഷയുടെ മാർക്ക് അന്തിമപട്ടിക തയ്യാറാക്കുന്നതിന് പരിഗണിക്കില്ല. 200 മാർക്ക് വീതമുള്ള രണ്ട് പേപ്പറാണ് പ്രിലിമിനറി പരീക്ഷയ്ക്കുണ്ടാവുക. രണ്ടുമണിക്കൂർ വീതമായിരിക്കും ദൈർഘ്യം. രണ്ട് പേപ്പറും ഒബ്‌ജക്ടീവ് രീതിയിലാകും.

രണ്ടാംഘട്ടമായ മെയിൻ പരീക്ഷയ്ക്ക് ഡിസ്‌ക്രിപ്റ്റീവ് രീതിയിലുള്ള എഴുത്തുപരീക്ഷയും അഭിമുഖവും ഉണ്ടാകും. എഴുത്തുപരീക്ഷയ്ക്ക് ഇംഗ്ലീഷും ഭാഷാവിഷയവും അഞ്ച് നിർബന്ധിത ജനറൽ സർവീസ് പേപ്പറുകളും രണ്ട് ഐച്ഛികവിഷയങ്ങളുമടക്കം ഒമ്പത് പേപ്പറുണ്ടാവും. എഴുത്തുപരീക്ഷയിൽ നിർദിഷ്ട കട്ട് ഓഫ് മാർക്ക് ലഭിക്കുന്നവരെ അഭിമുഖത്തിന് പരിഗണിക്കും. ഒഴിവിന്റെ രണ്ടുമടങ്ങ് പേരെയാണ് അഭിമുഖത്തിന് ക്ഷണിക്കുക. 275 മാർക്കാണ് അഭിമുഖത്തിന്.

നിബന്ധനകൾ

• ജനറൽ വിഭാഗക്കാരെ ആറുതവണ മാത്രമേ സിവിൽ സർവീസ് പരീക്ഷ (പ്രിലിമിനറി ഉൾപ്പെടെ) എഴുതാനനുവദിക്കൂ.

• ഒ.ബി.സി.ക്കാർക്ക് ഒമ്പതുതവണ പരീക്ഷ എഴുതാം. എസ്.സി., എസ്.ടി.ക്കാർക്ക് എത്രതവണ പരീക്ഷ എഴുതുന്നതിനും തടസ്സമില്ല.

• ജനറൽ വിഭാഗക്കാരായ ഭിന്നശേഷിക്കാർക്ക് ഒമ്പതുതവണ പരീക്ഷ എഴുതാം.

വിവരങ്ങൾക്ക്: www.upsconline.nic.in അവസാന തീയതി: മാർച്ച് മൂന്ന്

ഫോറസ്റ്റ് സർവീസ്

ഇന്ത്യൻ ഫോറസ്റ്റ് സർവീസി (ഐ.എഫ്.എസ്.) ൽ 90 ഒഴിവാണുള്ളത്. സിവിൽ സർവീസസ് പ്രിലിമിനറി ജയിക്കുന്നവർക്ക് ഇതിലേക്ക് പ്രത്യേക മെയിൻ പരീക്ഷയും ഇന്റർവ്യൂവും നടത്തും.

യോഗ്യത: അനിമൽ ഹസ്ബൻഡറി ആൻഡ് വെറ്ററിനറി സയൻസ്, ബോട്ടണി, കെമിസ്ട്രി, ജിയോളജി, മാത്തമാറ്റിക്സ്, ഫിസിക്സ്, സ്റ്റാറ്റിസ്റ്റിക്സ്, സുവോളജി വിഷയങ്ങളിൽ ഏതിലെങ്കിലും ബിരുദം അല്ലെങ്കിൽ അഗ്രിക്കൾച്ചർ/ഫോറസ്ട്രി/ എൻജിനിയറിങ് ബിരുദം. പരീക്ഷയെഴുതി ഫലം കാത്തിരിക്കുന്നവർക്കും അപേക്ഷിക്കാം.

പ്രായം: 01-08-2020ന് 21-നും 32-നും മധ്യേ. 02-08-1988നും 01-08-1999-നും ഇടയിൽ ജനിച്ചവർക്ക് മാത്രമേ അപേക്ഷിക്കാനാവൂ. നിയമാനുസൃത വയസ്സിളവ് ലഭിക്കും.

പ്രിലിമിനറിക്കുമുമ്പ്‌

19/02/2020 

എം.പി. ലിപിൻ രാജ്

: സിലബസിൽ തന്നിരിക്കുന്ന ചെറുകാര്യങ്ങളുടെ അടിവേര് മാന്തുന്ന ചോദ്യങ്ങളാണ് അടുത്ത കാലത്തായി യു.പി.എസ്.സി.ക്ക്‌ പ്രിയം. എന്നുകരുതി സൂര്യനുകീഴിലുള്ളതെല്ലാം ചോദിച്ചുകളയുമെന്ന പേടിവേണ്ട. ഔട്ട് ഓഫ് സിലബസ് ചോദ്യങ്ങൾ കാണില്ല.

അഥവാ അങ്ങനെ തോന്നിയാലും ഒടുവിൽ സിലബസ് വായിക്കുമ്പോൾ ഏതെങ്കിലും മൂലയിൽ കാണും, ആ ചോദ്യവുമായി ബന്ധപ്പെട്ട വിഷയം. നന്നായി എഴുതി പ്രതിഫലിപ്പിക്കുന്നവർക്ക് അപാരസാധ്യതകളുള്ള പരീക്ഷയാണെങ്കിലും പ്രിലിമിനറിയിൽ പലപ്പോഴും നടക്കുക അധികയോഗ്യതകളുള്ള ലക്ഷക്കണക്കിനുപേരുടെ ജീവൻമരണപോരാട്ടമാണ്. 2025 മാർക്കിൽ 275 മാർക്കുള്ള ഇന്റർവ്യൂ ഇപ്പോൾ ജയപരാജയം നിർണയിക്കുന്ന ഘടകമാണ്.

1. മെയിൻ പരീക്ഷയെ ഫോക്കസ്ചെയ്താണ് പഠനം പുരോഗമിക്കേണ്ടതെങ്കിലും മിക്കവരും ഒബ്ജക്ടീവ് ചോദ്യങ്ങൾ കാണാതെപഠിച്ചാണ് പ്രിലിമിനറിക്കുള്ള ഹരിശ്രീ കുറിക്കുക. അതിനാൽ ആദ്യംമുതൽക്കേ ആഴത്തിൽ വായിച്ച്‌ തയ്യാറെടുക്കുക.

2. മലയാളത്തിൽ മെയിൻ എഴുതാനും ഇന്റർവ്യൂ ചെയ്യാനും കഴിയുന്ന പരീക്ഷയാണെങ്കിലും ഇംഗ്ലീഷിനെയും കഴിയുമെങ്കിൽ ഹിന്ദിയെയും മുനകൂർപ്പിച്ച് കൈയിൽ വെക്കുക. ഇന്റർവ്യൂ സമയത്ത് എടുത്ത് വീശാൻപറ്റുന്ന ആയുധങ്ങളിലൊന്നാണ് ഹിന്ദി.

3. കാണുന്ന തടിപ്പുസ്തകങ്ങളെല്ലാം വാങ്ങി തലയണയാക്കുകയോ ബുക്ക് ഷെൽഫിൽ വെക്കുകയോ ചെയ്യുന്ന പ്രവണത നല്ലതല്ല. ഒരുവിധം പുസ്തകങ്ങളെല്ലാം ഓൺലൈനിൽ കിട്ടും.

4. ഒ.ബി.സി., മുന്നാക്കവിഭാഗങ്ങളിലെ പിന്നാക്കക്കാർ എന്നിവർ സർട്ടിഫിക്കറ്റുകൾ സമർപ്പിക്കുമ്പോൾ പ്രത്യേകം ശ്രദ്ധിക്കുക. മുന്നാക്ക സാമ്പത്തികപരിധി, ക്രീമി​െലയർ പരിധിയിൽ വരുന്നുണ്ടോ എന്നിവയൊക്കെ കൃത്യമായി കാണിക്കുക. പരിശീലനം മുഴുവൻ ഏതെങ്കിലും കോച്ചിങ് സെന്ററിനെ ഏൽപ്പിക്കുന്നത് നല്ലതല്ല. റാങ്ക് കിട്ടിയ ജേതാക്കളുടെ ഫോട്ടോകളുടെ എണ്ണത്തിന്റെ അടിസ്ഥാനത്തിലല്ല, മറിച്ച് ഏറ്റവും പുതിയ പഠനസൗകര്യം, മികച്ച അധ്യാപകർ എന്നിവ നോക്കിയാണ് പരിശീലന കേന്ദ്രങ്ങൾ വിലയിരുത്തേണ്ടത്.