കാസർകോട്: കോവിഡും ലോക്ക് ഡൗണും അതിജീവിച്ച് ജില്ല പത്താംക്ലാസ് പരീക്ഷയിൽ മുൻവർഷത്തെക്കാൾ മികച്ച വിജയംകൊയ്തു. 9402 പെൺകുട്ടികളടക്കം 19599 കുട്ടികൾ പരീക്ഷയ്ക്കിരുന്നതിൽ 9311 പെൺകുട്ടികളടക്കം 19326 പേർ ഉപരിപഠനത്തിന് അർഹത നേടി-98.607 ശതമാനം. അർഹത നേടാത്തത് 91 പെൺകുട്ടികളടക്കം 273 പേർ മാത്രം. 1685 പേർ മുഴുവൻ വിഷയങ്ങളിലും എ പ്ലസ് നേടി. 18975 പേർ പരീക്ഷയ്ക്കിരുന്ന കഴിഞ്ഞകൊല്ലം 18541 പേരാണ് വിജയച്ചത്-97.71 ശതമാനം. കഴിഞ്ഞ കൊല്ലം 434 പേർക്ക് അർഹതയുണ്ടായില്ല. ഇത്തവണ കുട്ടികളുടെ എണ്ണം കൂടിയിട്ടും വിജയം 0.897 ശതമാനം ഉയർന്നു. ഇത്തവണ 624 കുട്ടികൾ അധികം വന്നപ്പോൾ എ പ്ലസ് നേടിയ കുട്ടികളുടെ എണ്ണം 224 കൂടി.
കാസർകോട് വിദ്യാഭ്യാസജില്ലയിലെ 84-ഉം കാഞ്ഞങ്ങാട് വിദ്യാഭ്യാസ ജില്ലയിലെ 75-ഉം സ്കൂളുകളും അടക്കം 159 സ്കൂളുകളാണ് ഇത്തവണ പരീക്ഷയ്ക്ക് കുട്ടികളെ ഇരുത്തിയത്. സർക്കാർ വിദ്യാലയങ്ങൾ പതിവുപോലെ മികച്ച പ്രകടനം കാഴ്ചവെച്ചു. ആകെയുള്ള 96 വിദ്യാലയങ്ങളിൽ 49 എണ്ണം നൂറുശതമാനം വിജയം നേടി. 33 എയ്‌ഡഡ് സ്കൂളുകളിൽ 12 എണ്ണവും 30 അൺ എയ്‌ഡഡ് സ്കൂളുകളിൽ 22 എണ്ണവും മുഴുവൻ കുട്ടികളെയും വിജയിപ്പിച്ചവരിൽ ഉൾപ്പെടുന്നു. കാസർകോട് വിദ്യാഭ്യാസജില്ലയിൽ 10736 കുട്ടികൾ പരീക്ഷയ്ക്കിരുന്നപ്പോൾ 10530 പേർ വിജയം കണ്ടു. കാഞ്ഞങ്ങാട് വിദ്യാഭ്യാസ ജില്ലയിൽ 8863 പേർ എഴുതി. 8796 പേർ വിജയിച്ചു.
പതിവുപോലെ നായൻമാർമൂല തൻബീഹുൽ ഇസ്‌ലാം ഹയർ സെക്കൻഡറി സ്കൂളാണ് കൂടുതൽ കുട്ടികളെ പരീക്ഷയ്ക്കിരുത്തിയത് -772 പേരെ. ഇതിൽ 756 പേർ വിജയിച്ചു. രണ്ടാമത് കൂടുതൽ കുട്ടികളെ ഇരുത്തിയത് ചട്ടഞ്ചാൽ ഹയർ സെക്കൻഡറിയാണ്. അവർ 630 പേരെ ഇരുത്തി 620 പേരെ വിജയിപ്പിച്ചു. സർക്കാർ സ്കൂളുകളിൽ ഏറ്റവും കൂടുതൽ കുട്ടികളെ ഇരുത്തിയത് കുമ്പള ഗവ. ഹയർ സെക്കൻഡറി സ്കൂളാണ് 543 പേരെ. ഇതിൽ 518 പേർ വിജയിച്ചു -95.4 ശതമാനം വിജയം. ആറുപേർക്കേ മുഴുവൻ വിഷയങ്ങളിലും എ പ്ലസ് നേടാനായുള്ളൂ. ജില്ലയിലെ മികച്ച സർക്കാർ വിദ്യാലയമായ ചായ്യോത്ത് ഗവ. ഹയർ സെക്കൻഡറി സ്കൂൾ ഇത്തവണയും നൂറുശതമാനം നിലനിർത്തി.
പട്ടികവിഭാഗം വിദ്യാർഥികൾ കൂടുതൽ പരീക്ഷയ്ക്കിരുന്ന മലയോരങ്ങളിലെ സ്കൂളുകൾ വിജയം നേടി. 36 ശതമാനം പട്ടികവിഭാഗക്കാരുള്ള ബളാന്തോട് ഗവ. ഹയർ സെക്കൻഡറി സ്കൂൾ നൂറുശതമാനം വിജയം നേടി.
പത്താംക്ലാസ് പരീക്ഷയിൽ
കോവിഡിനെ അതിജീവിച്ച് ജില്ലയുടെ കുതിപ്പ്
No comments:
Post a Comment